Siaha Ziza : Ko hro zydua hlata atako Siaha Town chho liata Christmas ziza apha tah eisila eima reichhei nata pangiasa achhi vei. Ko hrola zy liana kha cha Christmas ziza nata adaihti liata Siaha Town chho liata sahma aparipanga pa akhiekha pa nata buana ataopa hmo awpa ama y tyh no ta atako deikua hmo awhpa ama soh kaw. Vaduana/chhiena accident vata hrona apahleipa tha thei awhpa chhao y lila vei ei. anodeikua December thla thaona la liana khata Auto Rickshaw Siaha tlapi liata accident pa liata chyhsa hrona 2 ama pahlei.
Thytliapazy nata Christmas : Thytliapa Satlia nata Laihsa thokha zy cha Awnanopa daihti taopa liata ahmapa ama y nota, thokha zy deikua viasa zy chhao ta o liata ahmapa chhao ama y hra. he hawta a cha nona heta Dt.24.12.2011 za kha cha Awnanopa thokha chareipakhyna liata zy cha satlia nata laihsa hmia hmo awhpa ama chyh kawpa ta reipa a cha. He hawta hmo awpa ama chyna chhapa he su hro la ama hma hapa vata a cha thlyu aw. Eima rei hla lei awpa cha he he a cha Siaha thyutliapa zy hry liata he su zy he apahno leipa eima soh kaw nata pangiasa achhi. Chazy cha ‘Bualpui Road’, ‘KVK Complex’, BDO Complex’ zy he a cha thly aw. He su he Dt,24.12.2011 za ta Siaha Satlia nata laihsa zy ta achhei nawpa (Sahma do nawpa chhao) su ta ama hma chaipa cha a cha. Chyhsa thokha ta ama reina dahta cha, “amyla mydi pa tala sahma oh,polythene nata Under pant zy ama huah thlyu aw!! he hawta acha khiata cha eima Siaha thyutliapazy ‘NIGHT LIFE’ cha pachachhie achhi kaw. Journalist pakha ta cha he hawna heta areih, “Siaha thyudu (tleirawl) chano zy hry liata Sahma (asaipa) adopa he 100 liata 75% rachho ama cha thlyu aw” ata!! (Pacha pazi awhpa 
)
Awnanopa nata Christmas : Khazohpa ngiachhiena vata atako he Siaha Vaih nano nanopa liata Awnanopazy ama ly kaw sai. Azola chareipakhyna liata kho pyu nata music pyu thapaw achhi hleikho ta, hla apha ngasa ha tyh. Tari Noh 25.12.2011 pa liana khata Awnanopa thokhazy ta kychhina ama hnei taraw pata Awnanopa hluvia cha amyla Dt.26.12.2011 liata kychhina he ama hnei sahlao. Awnanopa thokhazy cha atanoh la taihna khata kyhchhina he ama hnei pazao hei. Azo la ta chareipakhyna daihti ahmapa chata Vaih to liata Music chhaota la tyhpa cha ta. Thyulia, alai achy, macha zy ama ly ngasa ha tyh.
Sawkha nata Christmas : Christmas nata kothiepa alypa nata thapha, thlaloh kawpa ta moto ta eima hma thei chyu nawpa ta Siaha DC nata Police Department la tawhzy ta thata hmala eita. Police na zy ta Christmas daihti atlo hla tawhta Siaha town chho vaih to liata duty ama so lyma. DC la tawh chhaota Order zy papua pata, Siaha Town chho vaih lohawh viapa liata Christmas alykheina banner zy chhao ama tawh. aly awpa a cha hmeiseih. Myla tawhna heta Office thokha zy cha pahy heipa cha awta, thokha zy deikua January no 7 tawh rachho ta ama pahy nata hnabeiseihpa a cha.
